“Nizami” Kino Mərkəzində qısametrajlı film təqdimatı – “QIRXDAN SONRA…”
Dekabrın 24-də “Nizami” Kino Mərkəzində “Qırxdan sonra…” qısametrajlı bədii filminin təqdimatı baş tutub.
“İNFONEWS” – a “RS Production”un mətbuat katibi Həmidə Rüstəmova tərəfindən verilən məlumatında bildirib ki, mədəniyyət və incəsənət xadimlərinin, media mənsublarının iştirak etdiyi nümayişdən öncə səhnəyə çıxan filmin yaradıcı heyətinin ekran əsəri, yaranma ideyası, mövzu və ictimaiyyətə ötürdüyü əsas mesajları barədə məlumat veriblər.
Filmin ssenari müəlliflərindən Sevda Sultanova nümunədə nəinki aktrisaların, ümumilikdə qadınların düşüncələrinə, müəyyən yaşdan sonrakı mənəvi mübarizəsinə yer verdiklərini bildirib.
Filmin ssenari və quruluş müəllifi Saida Haqverdiyeva “Qırxdan sonra”da cəmiyyətimizdəki qadınların, xüsusən, yaradıcı qadınların, özünü ifadə etməyə çalışan həmcinslərimizin ümumiləşmiş obrazını yaratmağa çalışdıqlarını söyləyib. Filmin ərsəyə gəlməsində dəstək verən qurum və şəxslərə təşəkkürünü bildirib, bu silsilədən daha iki film çəkəcəyini, hazırda ikinci ekran işi üzərində işə başladıqlarını da əlavə edib.
Filmin qəhrəmanları – aktrisalar Zümrüd Qasımova və Gülçöhrə Abdullayeva belə bir fərqli və maraqlı, bir növ ürək sözlərini ekrana daşıyan layihəyə görə yaradıcı heyətə təşəkkür ediblər.
Sonra qısametrajlı bədii film kinosevərlərə təqdim olunub.
Qeyd edək ki, ekran əsərinin ssenari müəllifləri Sevda Sultanova və Saida Haqverdiyeva, quruluşçu rejissoru Saida Haqverdiyeva, görüntü rejissoru Şahmar Səfəroğludur. “RS Production”un istehsalı olan filmin (prodüser Kəmalə Nəhmətova) montaj rejissoru Əli Xiləli, ikinci operatoru Sahib Mikayılov, səs rejissoru Mehman Nadirov, səs operatoru Aslan Əlibəyovdur. Film Mədəniyyət Nazirliyinin dəstəyi ilə nümayiş olunub.
