Məhəmməd Füzulinin biblioqrafiyasının I cildi işıq üzü görüb
AMEA Məhəmməd Füzuli adına Əlyazmalar İnstitutunun Elmi şurasının qərarı ilə “Məhəmməd Füzuli: biblioqrafiya” ikicildliyinin I cildi işıq üzü görüb.
“İNFONEWS” – un İnstitutdan əldə etdiyi məlumat bildirilib ki, yeni nəşrin elmi redaktoru və “Ön söz”ünün müəllifi akademik Teymur Kərimli, tərtibçisi institutun Biblioqrafiya şöbəsinin müdiri Qutiyera Cəfərovadır.
Kitab dahi Azərbaycan şairi və mütəfəkkiri Məhəmməd Füzulinin 530 illik yubileyinə həsr edilmiş fundamental biblioqrafik göstəricidir. İki cilddən ibarət olan bu biblioqrafiyada görkəmli şairin zəngin irsi haqqında materiallar öz əksini tapıb. Biblioqrafik göstəricinin I cildinə “Görkəmli şəxsiyyətlər Füzuli haqqında”, “Məhəmməd Füzulinin əsərləri” və “Məhəmməd Füzulinin həyat və yaradıcılığı haqqında” başlıqlı bölmələr daxil edilib. Biblioqrafiya ədəbiyyatşünas alimlər, mütəxəssislər və geniş oxucu auditoriyası üçün nəzərdə tutulub.
Qeyd edək ki, kitabı Biblioqrafiya şöbəsinin əməkdaşları – baş biblioqraf İsmət Cəfərov, biblioqraf Nigar İbrahimova, kiçik elmi işçi Ramidə Abbasova, baş mütəxəssis Xəyalə Qasımlı, laborant Aytən Musayeva və Qərbi Azərbaycan və Qarabağ əlyazmalarının tədqiqi şöbəsinin kiçik elmi işçisi Sevinc Muxtarova hazırlayıblar. Biblioqrafiyanın kompüter dizaynı Əlyazmaların elektron resursları şöbəsinin baş mütəxəssisi Vüqar Hacıyeva və baş biblioqraf İsmət Cəfərova məxsusdur.
