Xoreoqrafiya Akademiyasına akkreditasiya şəhadətnaməsi təqdim edilib
“İNFONEWS” xəbər verir.
Təhsildə Keyfiyyət Təminatı Agentliyinin təşkilatçılığı ilə Bakı Xoreoqrafiya Akademiyasında akkreditasiya qiymətləndirilməsi həyata keçirilib. Proses təhsil naziri tərəfindən təsdiq edilmiş akkreditasiya qrafikinə uyğun olaraq baş tutub.
Akkreditasiya qiymətləndirilməsi Agentlik tərəfindən yaradılmış ekspertlərdən ibarət Komissiya tərəfindən aparılıb. Qiymətləndirilmə nəticəsində hazırlanan Yekun Hesabatlar əsasında Bakı Xoreoqrafiya Akademiyası növbəti 5 il müddətinə akkreditasiya olunmasına dair Təhsil Nazirliyi Akkreditasiya Şurası tərəfindən qərar qəbul edilib.
Müvafiq qərara əsasən, Agentlikdə sözügedən ali təhsil müəssisəsinə akkreditasiya şəhadətnaməsi təqdim edilib.
Qeyd edək ki, Nazirlər Kabinetinin müvafiq qərarı ilə “Təhsil müəssisələrinin akkreditasiyası Qaydaları” yeni redaksiyada təsdiq olunub. Həmin qaydalar tabeliyindən, mülkiyyət və təşkilati-hüquqi formasından asılı olmayaraq, Azərbaycan Respublikasının ərazisində bütün təhsil pillələri üzrə fəaliyyət göstərən təhsil müəssisələrinin (o cümlədən digər ölkələrin Azərbaycan Respublikasında fəaliyyət göstərən təhsil müəssisələrinin, filial və nümayəndəliklərinin) akkreditasiyası məsələlərini tənzimləyir.