“Leyli və Məcnun” əsəri ilk dəfə olaraq səhnələşdirildi
Azərbaycan Respublikası Prezidenti cənab İlham Əliyevin sərəncamına əsasən 2021-ci il ölkəmizdə dahi şair Nizami Gəncəvinin 880 illik yubileyi ilə bağlı olaraq “Nizami Gəncəvi İli” kimi qeyd olunmaqdadır.
“İNFONEWS” xəbər verir ki, gənclər siyasətini uğurlu şəkildə həyata keçirən və müxtəlif istedadlı gənclər kütləsinə malik Bakı Gənclər Mərkəzi “Nizami Gəncəvi İli” ilə bağlı start verdiyi silsilə layihələr çərçivəsində növbəti addımı ilə diqqət çəkib. Belə ki, ədibin “Leyli və Məcnun” əsəri Bakı Gənclər Mərkəzinin “SəhnədəSən” aktyorluq klubunun istedadlı gəncləri tərəfindən ilk dəfə olaraq dialoq formasında səhnələşdirilib.
Böyük mütəfəkkir Nizami Gəncəvinin dünya şöhrətli “XƏMSƏ”sinə daxil olan, sevgilərin ruhən birləşməsinə aparan, ülvi, saf və təmiz hissləri özündə təcəssüm etdirən bu əsər əsrlərdən bəri Şərqin misilsiz mədəni sərvətlər xəzinəsində layiqli yerini qoruyub saxlamışdır.
Hər zaman yenilikləri ilə təəccübləndirən Bakı Gənclər Mərkəzi növbəti layihələri ilə cəmiyyəti təəccübləndirməyə davam edir.