Əlilliyi olan şəxslərə 71 mühərrikli təkərli oturacaq verilib
”İNFONEWS” xəbər verir.
Əmək və Əhalinin Sosial Müdafiəsi Nazirliyi tərəfindən bu ilin mart ayında ölkəmizdə ilk dəfə olaraq əlilliyi olan şəxslərin mühərrikli təkərli oturacaqla təminatına başlanılıb. Ötən iki ayda əlilliyi olan şəxslərə 71 mühərrikli təkərli oturacaq verilib və hazırda proses davam edir.
Nazirliyin İctimaiyyətlə əlaqələr və kommunikasiya şöbəsindən verilən məlumata görə, Türkiyənin “Wollex” şirkətinin istehsalı olan həmin təkərli oturacaqlar mühərrik əsasında işləyir, standartlar daxilində 12 dərəcəli eniş zamanı hərəkət edə bilirlər. Jostiklə idarə edilirlər, jostik üzərində pasiyentin rahatlığı üçün sükan qolu, səsli xəbərdarlıq düyməsi, 5 pilləli sürət səviyyəsini tənzimləmə düyməsi yerləşir. Enerji ilə tam təmin olunduqda 20 kilometr məsafə qət edir. Əlilliyi olan şəxslərə kənar şəxsin köməyi olmadan sərbəst hərəkət etmək imkanı verir.
Ümumilikdə isə nazirlik tərəfindən bu ilin əvvəlindən 528 əlilliyi olan şəxs təkərli oturacaqla təmin edilib.