FHN əhaliyə növbəti dəfə müraciət edib

FHN əhaliyə növbəti dəfə müraciət edib

“İNFONEWS” xəbər verir.

Fövqəladə Hallar Nazirliyi (FHN) ildırımın səbəb ola biləcəyi təhlükələrdən qorunmaq üçün əhaliyə müraciət edib.

FHN-in mətbuat xidmətindən bildiriblər ki, müraciətdə şiddətli gurultu və parlaq qığılcımla (şimşəklə) müşayiət olunan ildırımın həm də yüksək gərginlikli elektrik boşalması olduğundan insan üçün ölümcül təhlükə yaratdığı diqqətə çatdırılıb. Bununla əlaqədar əhaliyə müraciət edilərək ildırımın yaratdığı təhlükələrdən qorunmaq üçün bəzi təhlükəsizlik qaydaları bir daha xatırladılıb.

“İldırım çaxan zaman:

– evdəsinizsə, sobada odu söndürün, qazı bağlayın, elektrik cihazlarını şəbəkədən ayırın, evin pəncərə və qapılarını örtün, pəncərənin qarşısında dayanmayın;

– telefonla (sabit şəbəkə, mobil, taksofon və s.) danışmayın;

– elektrik xətti, ildırım ötürücüsü, navalça və antenaya yaxınlaşmayın;

– yadda saxlayın ki, metal əşya ilə təmas təhlükəlidir (o cümlədən saat, sırğa, üzük, idman əşyaları və s.);

– daldalanmaq üçün hündür ağacların altında gizlənməyin. Nəzərə alın ki, ildırım düşməsi ağacların hündürlüyü ilə düz mütənasibdir. Belə ki, məsələn, ağacın hündürlüyü 4 metrdirsə, həmin ağacdan, ən azı 4 metr aralı dayanmaq lazımdır;

– yüksəklikdə, yaxud düzəngahdasınızsa, yüksək nöqtə kimi ildırımı cəlb etməmək üçün çökək yerə enib dizlərinizi qucaqlayaraq oturun;

– su hövzəsində çimirsinizsə və ya qayıqdasınızsa dərhal sahilə çıxın;

– avtomobildəsinizsə, hərəkəti dayandırın, onu tərk etmədən şüşələri qaldırıb ildırımın bitməsini gözləyin;

– traktor, otbiçən maşın, motosiklet və ya velosiped sürürsünüzsə, dərhal düşün və onlardan ən azı 30 metr aralanın;

– qrup halındasınızsa, aranızda ən azı 1,5 metr məsafə saxlayın.

Unutmayın: qaydalara biganəlik həyatımıza təhlükədir. Təhlükə zamanı 112-yə zəng edin!”, – deyə müraciətdə bildirilib.

 

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir