Rusiya əhəmiyyətli səylərə baxmayaraq, artıq Ukraynada hərbi məqsədlərinə nail ola bilmir.
“İNFONEWS” xəbər verir ki, bunu NATO-nun Baş katibi Yens Stoltenbq “Spiegel” nəşrinə müsahibəsində deyib.
O bildirib ki, Rusiyanın müharibədəki məqsədi Ukraynanın NATO və Avropa İttifaqına (Aİ) daxil olmasının qarşısını almaq olub: “Üstəlik, demək olar ki, 2 illik müharibədən sonra Ukrayna indi NATO və Aİ-yə əvvəlkindən daha yaxındır. Rusiya müharibəyə ciddi maliyyə sərf edir. Belə ki, ölkə artıq yüzlərlə təyyarə və minlərlə tank itirib. 300 mindən çox əsgər ölüb və ya yaralanıb. Bundan əlavə, müharibə nəticəsində inflyasiya artdı, həyat səviyyəsi aşağı düşdü. Rusiya siyasi cəhətdən əvvəlkindən daha çox təcrid olunub”.
Y.Stoltenberq söyləyib ki, müharibə yaxın vaxtda başa çatmayacaq: “Rusiyanın öz məqsədlərini və siyasətini dəyişəcəyinə dair heç bir işarə yoxdur. Rusiya daha çox ərazi işğal etməyə davam edəcək”.
Onun fikrincə, bu, o deməkdir ki, NATO və ona üzv olan 31 ölkə Ukraynaya güclü dəstəyi davam etdirməlidir: “Ukrayna NATO-dan dəstək alanda özünü müdafiə edə biləcəyini nümayiş etdirdi”.
Xatırladaq ki, Rusiya ilə Ukrayna arasında genişmiqyaslı müharibə ötən il fevralın 24-də başlayıb. Ukrayna bu ilin iyununda əks-hücum əməliyyatları keçirir. Rəsmi Kiyevin mövqeyinə görə, Ukraynanın ərazi bütövlüyü tam təmin olunmadan müharibə başa çatmayacaq. Ukrayna Prezidenti Volodimir Zelenski daha əvvəl bildirmişdi ki, Qərb dəstəyi dayandırsa, ölkəsi geri çəkiləcək. V.Zelenski əks-hücum əməliyyatının uğursuz olduğunu etiraf edib.