“Bir ədalət tərafdarı gəlib çıxa” deyiləndə – SƏNİN YERİN GÖRÜNƏCƏK!
Gərək heç kəs bunu unutmasın ki, 1993-cü ildə Azərbaycan parçalanmaq, bir ölkə kimi, müstəqil dövlət məhv olmaq təhlükəsi qarşısında idi. Azərbaycanda vətəndaş müharibəsi baş vermişdi… 1993-cü ildə Azərbaycan yanırdı.
Ümummilli lider Heydər ƏLİYEV
“İNFONEWS” təqdim edir:
Dünya durmaz bir məqamda,
dönər, haldan-hala düşər,
Yorulanda karvanbaşı
işi daldan-dala düşər.
Ayaqları dolaşanda
Başı gilü-qala düşər,
Bir xilaskar sorağıyla
çırpınanda arzu, dilək
Sənin yerin görünəcək!!!
Tərəzinin ağır gözü
şərə doğru əyiləndə,
Haqla nahaq savaşında
haqqın haqqı yeniləndə,
“Bir ədalət tərafdarı
gəlib çıxa” deyiləndə,
Qarışanda bir-birinə
insan, şeytan, iblis, mələk,
Sənin yerin görünəcək!!!
Keçir tarix, gedir zaman,
dövran əldən-ələ düşür
canlara vəlvələ düşür.
Yada hər vaxt Ustad düşür,
Ozan düşür, Dədə düşür,
Öz hökmünü həftədə bir
Dəyişəndə çərxi-fələk
Sərin yerin görünəcək!!!
Hər yüz ilin başında da,
hər ilin dörd fəslində də,
Hər il sənin ad günündə,
may günündə,
Sənin bizə ulu nemət,
İlahinin pay günündə,
Azərbaycan başdan-başa
açılanda çiçək-çiçək,
Dünya dadlı, dünya gözəl,
dünya şirin görünəcək,
Sənin yerin görünəcək!!!
Sənin yerin görünəcək!!!
Sənin yerin görünəcək!!!
Zəlimxan YAQUB