“Naxçıvan” Universitetində elektron kitabxananın təqdimatı olub
“İNFONEWS” xəbər verir:
“Naxçıvan” Universitetində elektron kitabxananın təqdimatı olub.
Universitetin mətbuat xidmətindən bildirilib ki, tədbirdə çıxış edən rektor, dosent Nurlana Əliyeva ali təhsil ocağının Elmi Kitabxanasının 1999-cu ildən fəaliyyətə başladığını qeyd edib. Bildirib ki, bu kitabxana oxuculara çap əsərlərindən və digər informasiya daşıyıcılarından səmərəli istifadə etmək məqsədilə xidmət göstərir. Hər cür texniki avadanlıqlarla təchiz edilmiş kitabxanada müxtəlif elm sahələri üzrə qruplaşdırılmış 9 fond və 9 oxu zalı, şöbələrin hər birində yerləşdirilmiş kompüter və surətçıxarma aparatları və 1 idarəedici serverlə təmin olunmuş 18 yerlik elektron resurslar və konfrans zalları var.
Rektor diqqətə çatdırıb ki, elektron kitabxananın fəaliyyətə başlaması elmi fəaliyyətlə məşğul olan hər kəsin işini daha da asanlaşdıracaq. Bu kitabxananın əsas məqsədi mərkəzləşdirilmiş kitabxana və informasiya bazasının və təsnifatının formalaşdırılması, oxucunun geniş elektron kitab bazasına giriş imkanının yaradılması ilə daha operativ istifadəni təşkil etməkdir.
Sonra universitetin İKT şöbəsinin əməkdaşı Şəfiqə İmanova elektron kitabxana haqqında geniş məlumat verib.
“Naxçıvan” Universiteti Elmi Kitabxanasının müdiri Zamin Babazadə çıxışında deyib ki, elmi kitabxananın fondunda müxtəlif illərin nəşr kolleksiyaları, görkəmli şəxsiyyətlərin avtoqrafları ilə yeganə nüsxələri qalmış çap əsərləri, regional əhəmiyyətli yerli nəşrlər külliyyatı, etnik, ölkəşünaslıq, fərdi və xüsusi kolleksiyalar əks olunub. Burada 4466 adda, 13841 sayda kitab, çoxlu lüğət, qəzet, jurnal mövcuddur.
Sonda elektron kitabxananın yaradılmasında əməyi olan əməkdaşlara təşəkkürnamə verilib.