III Karl Şahzadə Endryunun titullarının ləğvi prosesinə başladı
Kralın qərarına əsasən, Şahzadə Endryu bütün titullarından və fəxri adlarından məhrum ediləcək, həmçinin kral ailəsinə məxsus iqamətgahdan çıxarılacaq. Əvəzində ona başqa bir şəxsi mənzil təklif ediləcək. Bu qərar şahzadənin maliyyəçi Cefri Epşteynlə əlaqələrinə dair qalmaqallar və ittihamlar fonunda qəbul edilib.
“İNFONEWS” bu barədə “Reuters”-un Bukingem sarayının bəyanatına istinadən xəbər verir. Bəyanatda qeyd olunur ki, Endryuya “Royal Lodge” adlı malikanənin icarəsindən imtina etməsi və alternativ şəxsi mənzilə köçməsi barədə rəsmi bildiriş göndərilib.
Şahzadəyə qarşı təzyiqin əsas səbəbi onun seksual cinayətlərdə ittiham olunan Cefri Epşteynlə əlaqələridir. Epşteyn azyaşlıları fahişəliyə cəlb etdiyi üçün məhkum edilmişdi. Endryu isə zorlamada iştirakda şübhəli bilinirdi — onu bu cinayətdə, xüsusilə, Avstraliyada evində ölü tapılan hüquq müdafiəçisi Virciniya Cuffre ittiham etmişdi.
Əvvəllər şahzadə Endryu artıq hərbi rütbələrindən, xeyriyyə təşkilatlarının himayədarlığından və “Zati-Aliləri” müraciət formasından məhrum edilmişdi.
“The Telegraph” oktyabrın ortalarında yazmışdı ki, Şahzadə kralın təzyiqi altında “York Hersoqu” titulundan könüllü şəkildə imtina etmək qərarına gəlib.
Məlumata görə, kralın kiçik qardaşı həmçinin Böyük Britaniyanın Ən Ali Cəngavərlik ordeni olan “Qartel Ordeni” üzvlüyündən də çıxarılmalı idi. Bununla belə, onun Şahzadə titulu doğum hüququna görə qalmalı idi, çünki Endryu mərhum Kraliça II Yelizavetanın oğludur.
“The Telegraph” qeyd edir ki, York hersoqu tituluna və “Qartel Ordeni”nə dair qərar Bukingem sarayında keçirilən bir sıra iclaslardan sonra, Şahzadənin Epşteynlə əlaqələrinə dair yeni qalmaqallar fonunda qəbul edilib. Kralın məsləhətçiləri yeni ifşaların baş verə biləcəyini nəzərə alaraq, bu addımları zəruri hesab ediblər.
“Epşteyn işi” azyaşlı qızların seksual istismara cəlb olunduğu şəbəkə ilə bağlı idi. İstintaq versiyasına görə, bu şəbəkəni Epşteyn özü qurmuşdu. O, 2008-ci ildə fahişəlik işi üzrə günahını etiraf etmiş, 2019-cu ildə insan alverinə görə yenidən həbs olunmuş, lakin həbsxanada intihar etmişdi.
Epşteyn işinə dair materiallarda — “Epşteyn faylları”nda — siyasətçilər, biznesmenlər və mədəniyyət xadimləri də daxil olmaqla, minlərlə sənəd və ad yer alır. Bu adların hallanması həmin şəxslərin cinayətlərdə iştirakını sübut etmir, amma adətən ictimai rezonans doğururdu.
Şahzadə Endryu Virciniya Cuffrenin onunla yeniyetmə yaşlarında cinsi əlaqəyə məcbur edildiyi iddiasından sonra diqqət mərkəzinə düşüb. Endryu ittihamları rədd etsə də, 2022-ci ildə Cuffre ilə məhkəmədənkənar barışıq sazişi bağlayıb. Qalmaqal nəticəsində o, rəsmi vəzifələrindən və kral ailəsindəki bir sıra titullarından məhrum edilib.